Wasiƙa Domin Ku

Wasiƙa Domin ku wani take ne da aka fi sani da wasu wasiƙu da Ayatullahi Sayyid Ali Khamna'i, jagoran Jamhuriyar Musulunci ta Iran, ya fitar a Janairu 2015M da Disamba 2015, yana mai magana ga matasan Turai da Arewacin Amurka gaba ɗaya.

An fitar da wasiƙa ta farko ne bayan wata sabuwar ƙaruwr tsoron Musulunci (Islamophobia) a ƙasashen yamma, wadda ta biyo bayan ayyukan ta'addanci na ƙungiyoyin takfiri kamar Da'ish (ISIS ). Musamman bayan harin da membobin wannan ƙungiya suka kai ofishin mujallar Shali Hebdo ( Charlie Hebdo) a Faransa a 7 Janairu 2015, mujallar da a baya ta wallafa zane‑zanen barkwanci na cin mutuncin Annabi Akram (S.A.W). An wallafa wasiƙar a 21 Janairu 2015.

A cikin wannan saƙo, Ayatullahi Khamna'i ya gabatar da wasu tambayoyi da bayanai domin sukar da kuma nazarin ayyukan da ƴan siyasar ƙasashen yamma ke yi na yaɗa tsoron Musulunci. Ya kuma tunatar da tarihin gwamnatocin yamma na tashin hankali, wariyar launin fata, mulkin mallaka, yaƙe‑yaƙen addini, da kuma kashe‑kashen da ba a taɓa ganin irinsu ba a Yaƙin Duniya na Farko da na Biyu. Sannan ya bukaci matasan Turai da Arewacin Amurka su san Musulunci ta hanyar manyan tushensa, wato Alƙur'ani da rayuwar Annabi Muhammad (SAW), kuma su guji yin hukunci ko zato game da Musulunci tun kafin su san gaskiyarsa.

An yaɗa wannan saƙo sosai a shafukan sada zumunta ta hanyar hashtag "Wasiƙa gare ku", kuma ya bazu a yanar gizo cikin harsuna daban‑daban

A Disamba 2015, bayan hare‑haren Paris na Nuwamba 2015, Ayatullahi Khamna'i ya rubuta wasiƙarsa ta biyu ga matasan Turai.

Jigon Da Rubutun Wasiƙar

Wasiƙar ta fara da gabatarwa wadda ta bayyana dalilin rubuta ta da kuma dalilin da ya sa aka zaɓi matasa a matsayin masu karɓar saƙon. Bayan haka ta kasu kashi biyu gaba ɗaya:

• Sashe na farko: Gargadi game da yaɗuwar tsoron Musulunci a ƙasashen yamma, wanda a cewarsa ya ƙaru musamman bayan rushewar Tarayyar Sobiyat (Soviet).
• Sashe na biyu: Gayyata ga masu karatu su yi nazarin Musulunci daga tushensa na asali, wato Alƙur'ani da rayuwar Annabi Muhammad (S.A.W). Muhimmin abin da aka jaddada a wannan sashe shi ne kada kafafen yaɗa labarai su gabatar da ƴan ta'adda a matsayin wakilan Musulunci.

Cikakken Matanin Wasiƙa Domin Ku

Da Sunan Allah Mai Rahama Mai Jin Ƙai

Zuwa ga matasa gaba ɗaya a Turai da Arewacin Amurka

Abubuwan da suka faru kwanan nan a Faransa, da kuma irin waɗannan abubuwan da suka faru a wasu ƙasashen yamma, sun sa na yanke shawarar in yi magana da ku kai tsaye game da su.

Zuwa ga matasa gaba ɗaya a Turai da Arewacin Amurka Abubuwan da suka faru kwanan nan a Faransa, da kuma irin waɗannan abubuwan da suka faru a wasu ƙasashen yamma, sun sa na yanke shawarar in yi magana da ku kai tsaye game da su. Ina yi muku magana ne ku matasa; ba don ina watsi da iyayenku maza da mata ba, a’a, sai don ina ganin makomar al’umma da ƙasarku tana hannunku, kuma ina samun cewa sha’awar neman gaskiya tana da rai sosai a cikin zukatanku, tare da ƙarin farkawa da kula. Haka kuma, a cikin wannan rubutu ba na magana da ƴan siyasa da shugabannin gwamnatinku, domin ina ganin cewa da gangan suka raba hanyar siyasa da tafarkin gaskiya da adalci.

Maganata da ku ita ce game da Musulunci, musamman ma game da hoto da siffar da ake gabatar muku da ita ta wannan addini. Tun shekaru kusan ashirin da suka gabata, wato kusan bayan rushewar Tarayyar Soviet, an yi ƙoƙari mai yawa domin a mayar da wannan babban addini matsayin wani abokin gaba mai ban tsoro. Ƙarfafa jin tsoro da ƙiyayya da kuma amfani da su, abin takaici, yana da dogon tarihi a siyasar Yamma. A nan ba na son in yi bayani a kan nau’o’in "tsoro" daban-daban da aka dasa wa al’ummomin Yamma har zuwa yau. Ku da kanku, ta hanyar ɗan duba binciken suka na baya-bayan nan kan tarihi, za ku ga cewa a cikin sabbin rubuce-rubucen tarihi an yi Allah-wadai da halayen rashin gaskiya da yaudara na gwamnatocin Yamma wajen mu’amala da sauran al’ummomi da al’adun duniya. Tarihin Turai da Amurka yana jin kunya saboda bautar bayi, yana jin kunya saboda zaman mulkin mallaka, yana jin kunya saboda zaluncin da aka yi wa masu launin fata da waɗanda ba Kiristoci ba; masu bincike da masana tarihi sun nuna matuƙar nadama kan zubar da jini da aka yi da sunan addini tsakanin Katolika da Furotesta, ko kuma da sunan ƙasa da ƙabilanci a yaƙe-yaƙen duniya na farko da na biyu.

Wannan abu kansa abin yabawa ne, kuma manufata wajen ambaton wani ɓangare na wannan dogon jerin ba ita ce in zargi tarihi ba, sai dai ina so ku tambayi masu ilimi a cikinku: Me ya sa lamirin jama’a a Yamma yake yawan farkawa ne bayan shekaru da dama, wani lokaci ma bayan ɗaruruwan shekaru? Me ya sa gyaran fahimtar jama’a yake mayar da hankali ga abubuwan baya na nesa, ba matsalolin yau ba? Me ya sa a wani muhimmin batu kamar yadda ake mu’amala da al’adun Musulunci da tunaninsa ake hana samuwar fahimtar jama’a?

Kun san cewa wulakanta “wani”, ƙirƙirar ƙiyayya da tsoro marasa tushe gare shi, su ne tushen da ya haɗu a bayan dukkan waɗannan amfani da mutane cikin zalunci. Yanzu ina so ku tambayi kanku: Me ya sa tsohuwar manufar yaɗa tsoro da ƙiyayya, a wannan lokaci take nufin Musulunci da Musulmi da wani ƙarfi da ba a taɓa gani ba? Me ya sa tsarin iko na duniya a yau yake son a mayar da tunanin Musulunci gefe, ya kasance mara tasiri? Wane irin ma’ana da ƙima ne suke cikin Musulunci da suke hana shirye-shiryen manyan ƙasashe? Kuma waɗanne irin maslahohi ake samu ta hanyar ƙirƙirar mummunan hoto game da Musulunci? Saboda haka, buƙatata ta farko ita ce ku yi bincike kan dalilan wannan baƙanta suna mai faɗi da ake yi wa Musulunci.

Buƙatata ta biyu ita ce ku yi ƙoƙarin samun sani kai tsaye ba tare da tsaka-tsaki ba game da wannan addini, a matsayin martani ga yawan zato da kuma farfaganda mara kyau. Hankali mai kyau yana buƙatar ku san abin da ake tsoratar da ku daga gare shi, menene ainihinsa kuma wane irin hali yake da shi. Ba na tilasta muku ku karɓi fahimtata ko wata fahimta ta Musulunci ba, amma ina cewa kada ku bari a gabatar muku da wannan gaskiya mai rai wadda take da tasiri a duniyar yau ta hanyar son zuciya da mugayen manufofi. Kada ku bari a yaudare ku ta hanyar gabatar da ‘yan ta’adda waɗanda aka ɗauki hayarsu a matsayin wakilan Musulunci. Ku san Musulunci ta hanyar tushe na asali da madogaran farko. Ku san Musulunci ta hanyar Alƙur’ani da rayuwar babban Annabinsa (tsira da amincin Allah su tabbata a gare shi).

A nan ina son in tambaye ku: Shin kun taɓa komawa kai tsaye zuwa Alƙur’anin Musulmi? Shin kun taɓa karanta koyarwar Manzon Allah (tsira da amincin Allah su tabbata a gare shi) da darussansa na ɗan Adam da ɗabi’a? Shin bayan kafafen yaɗa labarai, kun taɓa samun saƙon Musulunci daga wani tushe dabam? Shin kun taɓa tambayar kanku yadda wannan Musulunci, bisa waɗanne ƙimomi, ya samar da babbar wayewar ilimi da tunani a duniya tsawon ƙarnuka, tare da haɓaka manyan masana da masu tunani?

Ina roƙonku kada ku bari a sanya shinge na zuciya da motsin rai tsakaninku da gaskiya ta hanyar munanan hotuna da wulakantattun bayanai, har a hana ku yin hukunci cikin adalci. A yau da kayan sadarwa suka karya iyakokin ƙasa, kada ku bari a kulle ku cikin iyakoki na ƙarya da na tunani. Ko da yake ba wanda zai iya shi kaɗai ya cike gibin da aka samar, amma kowannenku zai iya gina gada ta tunani da adalci a kan waɗannan gibba domin wayar da kansa da na waɗanda suke kewaye da shi.

Wannan ƙalubalen da aka shirya tun farko tsakanin Musulunci da ku matasa, duk da cewa abin damuwa ne, amma yana iya haifar da sababbin tambayoyi a cikin zukatan masu bincike da neman gaskiya. Ƙoƙarin neman amsoshin waɗannan tambayoyi zai ba ku babbar dama wajen gano sabbin gaskiya. Saboda haka, kada ku rasa wannan dama ta fahimtar Musulunci yadda ya kamata ba tare da son zuciya ba, domin wataƙila saboda alhakin da za ku ɗauka wajen neman gaskiya, masu zuwa nan gaba za su rubuta wannan lokaci na hulɗar Yamma da Musulunci da ƙarancin baƙin ciki da kuma lamiri mai kwanciyar hankali.
Sayyid Ali Khamenei

1/11/1393 Shamsiyya (20/1/2015 Miladiyya)

Wasiƙa Ta Biyu

Bayan hare‑haren Paris da suka faru a 13 Nuwamba 2015M,Ayatullah Khamna'i ya rubuta wasiƙa ta biyu ga matasan ƙasashen yamma a 29 Nuwamba 2015. Ya bayyana munanan hare‑haren ta'addanci a Faransa a matsayin wani yanayi da zai iya zama damar yin tunani tare. Ya kuma lissafa wasu misalai masu raɗaɗi na sakamakon ta'addanci, kamar yadda ya ce: ta'addancin da wasu manyan ƙasashe suka goyi baya a duniyar Musulmi, goyon bayan ta'addancin gwamnati na Isra'ila, da kuma hare‑haren soja da suka jawo ɓarna da aka kai cikin duniyar Musulmi a shekarun baya. Sai ya rubuta cewa: Ina roƙon ku, ku matasa, ku kafa ginshiƙan mu'amala mai kyau da daraja da duniyar Musulmi, bisa fahimta madaidaiciya, zurfin tunani, da kuma amfani da darussan abubuwan raɗaɗin da suka faru.

Cikakken Matanin Wasiƙa Ta biyu

Da Sunan Allah Mai Rahama Mai Jin Ƙai Ga dukkan matasa a ƙasashen Yamma.

Ayukan baƙin ciki da makahon ta'addancin ya haifar a Faransa sun sake motsa ni in yi magana da ku matasa. Abin takaici ne a gare ni cewa irin waɗannan abubuwa ne suke haifar da damar yin magana; amma gaskiyar ita ce, idan irin waɗannan abubuwa masu raɗaɗi ba su zama wata hanya ta neman mafita da kuma damar yin tunani tare ba, to asarar za ta ninka.

Wahalar kowane mutum a ko'ina cikin duniya, ita kanta tana daɗaɗa wa sauran mutane rai. Ganin yaro da yake rasuwa a gaban idanun ƴan uwansa, uwa wadda farin cikin iyalinta ya koma makoki, miji da yake ɗauke da gawar matarsa cikin gaggawa zuwa wani wuri, ko kuma wanda yake kallo ba tare da sanin cewa cikin ƴan mintuna kaɗan zai ga ƙarshen wasan rayuwa ba, waɗannan ba hotuna ba ne da ba za su motsa zuciyar ɗan Adam ba.

Duk wanda yake da wani kaso na ƙauna da ƴan adamtaka, zai ji raɗaɗi da tausayawa idan ya ga irin waɗannan al'amura; ko sun faru a Faransa, ko a Palasɗinu, Iraƙi, Labanun ko Siriya. Lalle ne Musulmi biliyan ɗaya da rabi ma suna da irin wannan ji, kuma suna ƙin kuma suna ƙyamar masu aikatawa da kuma masu haddasa irin waɗannan bala'o'i.

Amma batun shi ne: idan wahalhalun yau ba su zama hanyar gina gobe mafi alheri da mafi aminci ba, to za su koma kawai tarihin abubuwa masu ɗaci marasa amfani.

Ina da tabbaci cewa ku ne matasa kaɗai da za ku iya, ta hanyar ɗaukar darasi daga matsalolin yau, ku sami sabbin hanyoyi don gina makoma, kuma ku zama katanga ga hanyoyin kuskure da suka kai yammacin duniya zuwa wannan matsayi na yanzu.

Gaskiya ne cewa a yau ta'addanci ciwo ne na bai‑ɗaya tsakanin mu da ku, amma ya dace ku sani cewa rashin tsaro da firgicin da kuka fuskanta a abubuwan da suka faru kwanan nan, yana da manyan bambance‑bambance guda biyu da wahalar da mutanen Iraƙi, Yaman, Siriya da Afganistan suka jure tsawon shekaru masu yawa.

Na farko, duniyar Musulmi ta kasance cikin firgici da tashin hankali a faɗi mafi girma, a yawan da ya fi yawa, kuma na tsawon lokaci mai tsawo.

Na biyu kuma, abin takaici shi ne cewa waɗannan tashin hankulan sau da yawa wasu manyan ƙasashe ne suka tallafa musu ta hanyoyi daban‑daban kuma cikin tasiri.

A yau, mutane kaɗan ne ba su san rawar da Amurka ta taka ba wajen ƙirƙira ko ƙarfafa da kuma ba da makamai ga Al‑ƙa'da, Taliban, da kuma mabiyansu masu muni.

Baya ga wannan tallafi kai tsaye, masu goyon bayan ta'addancin takfiriyya waɗanda aka sani a fili, duk da cewa suna da tsarin siyasa mafi koma baya, sun kasance a kullum cikin jerin abokan kawancen yamma.

Wannan kuwa yana faruwa ne a lokaci guda da ra'ayoyi masu ci gaba da haske, waɗanda suka taso daga ƙoƙarin kafa dimokuraɗiyya mai rai a yankin, ake murkushe su ba tare da jin ƙai ba.

Dabarar da yamma ke amfani da ita ta fuska biyu wajen mu'amala da motsin farkawar Musulmi a duniyar Musulmi, wata misali ce bayyananniya ta saɓani cikin manufofin siyasar yamma.

Sauran fuskar wannan saɓani ana ganinsa a goyon bayan ta'addancin gwamnati na Isra'ila. Mutanen Falastinu da ake zalunta sun fi shekaru sittin suna fuskantar mafi muni daga cikin nau'o'in ta'addanci.

Idan mutanen Turai a yau suna shafe ƴan kwanaki suna fakewa a gidajensu kuma suna guje wa tarurruka da wuraren cunkoso, iyali na Falasɗinu sun shafe shekaru da dama ba su ma samun tsaro ko a cikin gidajensu daga na'urar kisa da rusau ta gwamnatin sahyoniyawa.

A yau, wane irin tashin hankali ne za a iya kwatanta shi da girma da tsananin zalunci kamar ginin matsugunan Yahudawa (Settlements) da gwamnatin sahyoniyawa ke yi? Wannan gwamnati, ba tare da ta taɓa fuskantar tsawatarwa mai tsanani da tasiri daga abokan kawancenta masu ƙarfi ko aƙalla daga ƙungiyoyin ƙasa da ƙasa da ake ganin kamar masu zaman kansu, kullum tana rushe gidajen Falasɗinawa, tana lalata gonakinsu da lambunansu.

Sau da yawa ma hakan na faruwa ne ba tare da ba su damar kwashe kayan rayuwarsu ba ko ma damar girbe amfanin gonakinsu ba. Kuma galibi duk wannan yana faruwa ne a gaban idanun mata da yara cikin firgici da hawaye, waɗanda suke shaida duka da cin zarafin ƴan uwansu, kuma a wasu lokuta ana kai su zuwa gidajen azaba masu ban tsoro.

Shin a duniyar yau akwai wani irin zalunci da wannan girma, wannan faɗi, kuma da wannan tsawon lokaci?

Harbin mace a tsakiyar titi, kawai saboda ta yi zanga‑zangar adawa da soja mai makamai, idan wannan ba ta'addanci ba ne, to mene ne?

Shin wannan dabbanci saboda kawai sojojin wata gwamnati mai mamaya ne suka aikata shi, bai kamata a kira shi tsattsauran ra'ayi da ta'addanci ba? Ko kuwa wataƙila waɗannan hotuna saboda an dade ana nuna su a talabijin tsawon shekaru sittin, ba sa ƙara motsa lamirinmu da zuciyarmu kamar da ba?

Hare‑haren soja na shekarun baya a duniyar Musulmi, waɗanda su ma suka yi sanadin yawan waɗanda suka mutu, wani misali ne na dabarar da ta ƙunshi saɓani a siyasar yamma.

Ƙasashen da aka kai wa hari, baya ga asara ta rayukan mutane, sun kuma rasa ginshiƙan tattalin arziƙinsu da masana'antunsu. Tafiyarsu zuwa ci gaba da bunƙasa ta tsaya cak ko ta yi rauni, kuma a wasu lokuta ta koma baya na shekaru da dama. Duk da haka, cikin rashin kunya ana roƙon su da kada su ɗauki kansu a matsayin waɗanda aka zalunta.

Ta yaya za a iya maida ƙasa ta zama kango, a ƙone birane da ƙauyukanta, sannan a ce musu: don Allah kada ku ɗauki kanku a matsayin waɗanda aka zalunta?

Maimakon a kira mutane su yi kamar ba su fahimta ba ko kuma su manta da bala'o'in da suka faru, shin ba zai fi kyau a yi gafara ta gaskiya ba?

Wahalhalun da duniyar Musulmi ta sha a waɗannan shekarun saboda fuska biyu da kuma ƙawata kamannin masu kai hari, ba su yi ƙasa da asara ta kayan duniya ba.

Ya ku matasa masu daraja! Ina fata cewa ku, a yanzu ko a nan gaba, za ku iya canja wannan tunani da ya gurɓace da riya da yaudara; tunanin da fasaharsa ita ce ɓoye ainihin manufofi da kuma ƙawata mugayen niyoyi.

A ganina, mataki na farko wajen samar da tsaro da kwanciyar hankali shi ne gyara wannan tunani da ke haifar da tashin hankali.

Muddin ma'auni biyu suna ci gaba da mamaye siyasar yamma, kuma muddin ta'addanci a idanun masu ƙarfi da ke goyon bayansa ana rarraba shi zuwa mai kyau da mara kyau, kuma har sai lokacin da muradun gwamnatoci suke fifita kan ƙimomin ɗan Adam da na ɗabi'a, bai kamata a nemi tushen tashin hankali a wani wuri dabam ba.

Abin takaici, tushen waɗannan matsaloli tsawon shekaru da dama sun shiga cikin zurfin manufofin al'adu na yamma, suna shirya wani hari mai laushi kuma shiru.

Yawancin ƙasashen duniya suna alfahari da al'adunsu na gargajiya da na ƙasa, al'adu waɗanda duk da bunƙasa da sabuntawa, sun ciyar da al'ummomin ɗan Adam tsawon daruruwan shekaru. Duniyar Musulmi ma ba ta fita daga wannan ba.

Amma a zamanin yau, duniyar yamma, ta amfani da kayan aiki na zamani masu ci gaba, tana dagewa wajen kwaikwayon da kuma daidaita al'adun duniya zuwa tsari guda. Ni ina ganin tilasta al'adun yamma ga sauran al'umma da kuma ƙasƙantar da al'adu masu zaman kansu a matsayin wani irin tashin hankali shiru amma mai matuƙar illa.

Ana wulaƙanta al'adu masu arziƙi kuma ana cin mutuncin mafi tsarkakakkun ɓangarorinsu, alhali kuwa al'adar da ake son maye gurbinsu da ita ba ta da ikon zama madadinsu.

Misali, abubuwa biyu, tashin hankali da lalacewar ɗabi'a, waɗanda abin takaici sun zama manyan sassa na al'adun yamma, sun rage karɓuwarta da darajarta har ma a cikin inda ta samo asali.

Yanzu tambaya ita ce:

Idan mu ba mu so al'ada mai rikici, mai lalacewa kuma marar ma'ana, shin mu ne masu laifi?

Idan muka dakatar da ambaliyar lalacewa da ake turo wa ga matasanmu ta hanyar kayayyakin da ake kira fasaha, shin mu ne masu laifi?

Ba na musun muhimmanci da darajar hulɗar al'adu tsakanin al'umma. Idan irin wannan hulɗa ta faru a yanayi na halitta kuma tare da girmama al'ummar da za ta karɓa, tana kawo ci gaba, bunƙasa da wadata.

Amma hulɗa da ba ta dace ba ko wadda aka tilasta, yawanci ba ta yi nasara ba kuma tana haifar da hasara.

Abin takaici ne cewa dole ne in ce ƙungiyoyi marasa daraja kamar Da'ish (ISIS), sun fito ne daga irin wannan haɗuwar da ba ta dace ba da al'adu na waje.

Idan matsalar da gaske ta kasance ta aƙida, to ya kamata irin waɗannan abubuwa su bayyana a duniyar Musulmi tun kafin zamanin mulkin mallaka. Amma tarihi ya nuna akasin haka.

Shaidun tarihi masu tabbas suna nuna yadda haɗuwar mulkin mallaka da wani tunani mai tsattsauran ra'ayi da aka ƙi, wanda ya taso a cikin wata ƙabila ta hamada, ya shuka irin tsattsauran ra'ayi a wannan yankin.

In ba haka ba, ta yaya zai yiwu daga ɗaya daga cikin mafi ɗabi'a da mafi jinƙai daga cikin manyan addinan duniya, wanda a cikin tushensa yake cewa kashe mutum guda kamar kashe dukan bil'adama ne, sai a sami wani mugun abu kamar ISIS ya fito daga gare shi?

A gefe guda kuma, ya kamata a tambaya: me ya sa wasu da aka haifa a Turai, kuma aka taro su a wannan muhalli na tunani da na ruhaniya, suke janyo zuwa irin waɗannan ƙungiyoyi?

Shin za a iya gaskata cewa mutane da tashi sau ɗaya ko sau biyu zuwa yankunan yaƙi, nan take su zama masu tsattsauran ra'ayi har su fara harbin ƴan ƙasarsu?

Tabbas bai kamata a manta da tasirin shekaru na rayuwa da ciyarwa da al'adu marasa lafiya a cikin muhalli gurɓatacce mai haifar da tashin hankali ba.

Dole ne a yi bincike mai zurfi da cikakke a wannan fanni, binciken da zai gano gurɓacewar da ake gani da kuma wadda ba a gani a cikin al'umma.

Wataƙila ƙiyayya mai zurfi da aka shuka a cikin wasu ɓangarori na al'ummomin yamma, a lokacin bunƙasar masana'antu da tattalin arziki, sakamakon rashin daidaito da kuma yiwuwar wariya ta doka da tsarin zamantakewa, ta haifar da ƙunci da raɗaɗin zuciya wanda lokaci zuwa lokaci yana bayyana cikin irin waɗannan halaye masu kama da cuta.

A kowane hali, ku ne ya kamata ku fasa ɓangarorin da ke saman al'ummarku, ku gano ƙullaye da ƙiyayya, ku kuma kawar da su. Dole ne a gyara rarrabuwar kai maimakon a ƙara zurfafa ta.

Babban kuskure a yaƙi da ta'addanci shi ne amfani da matakai na gaggawa da na fushi waɗanda ke ƙara faɗaɗa rarrabuwar da ta riga ta wanzu.

Duk wani aiki na motsin rai ko gaggawa da zai jefa al'ummar Musulmi mazauna Turai da Amurka — waɗanda suka ƙunshi miliyoyin mutane masu aiki da alhaki — cikin keɓancewa, tsoro ko damuwa, ko kuma ya ƙara tauye musu haƙƙoƙinsu na asali kuma ya fitar da su daga rayuwar jama'a, ba kawai ba zai magance matsalar ba, har ma zai zurfafa tazara kuma ya faɗaɗa ƙiyayya.

Matakai na wucin‑gadi da na martani, musamman idan suka sami tushen doka, ba za su haifar da wani abu ba face ƙara rarrabuwar kai da kuma buɗe ƙofa ga rikice‑rikicen nan gaba.

Bisa ga rahotannin da aka samu, a wasu ƙasashen Turai an kafa dokoki da ke ƙarfafa ‘yan ƙasa su yi leƙen asiri a kan Musulmai. Irin wannan hali zalunci ne, kuma duk mun san cewa zalunci yana da halin komawa ga wanda ya aikata shi.

Bugu da ƙari, Musulmai ba su cancanci irin wannan rashin godiya ba. Duniyar yamma ta san Musulmai tsawon ƙarnuka:

A lokacin da ƴan yamma suka kasance baƙi a ƙasashen Musulmi kuma suka sa ido ga arzikin mai gida;

Da kuma lokacin da suka zama masu masauki, suka kuma amfana da aiki da tunanin Musulmai.

A mafi yawancin lokuta, abin da suka gani daga Musulmai shi ne alheri da haƙuri.

Saboda haka, ina roƙon ku ya ku matasa, ku gina tushen mu'amala mai kyau da mai mutunci da duniyar Musulmi, bisa ingantaccen sani, zurfin tunani, da kuma koyo daga abubuwan da suka faru masu raɗaɗi.

Idan kuka yi haka, a cikin lokaci ba mai tsawo ba, za ku ga cewa ginin da kuka kafa a kan irin wannan tushe zai shimfiɗa inuwa ta amincewa da yarda a kan waɗanda suka gina shi, zai ba su ɗumin tsaro da kwanciyar hankali, kuma zai hasaka duniya da bege na makoma mai haske.

A baya ma, Jagoran Juyin Juya Halin Musulunci ya rubuta wasiƙa ga matasan Turai da Arewacin Amurka a Fabrairu na shekarar da ta gabata, bayan hare‑haren ta'addanci a Faransa da kuma motsa fitinar ƙyamar Musulunci da tsoronsa (Islamophobia) da ya biyo baya.

Sayyid Ali Khamenei

8 Azar 1394 Shamsi, yana daidai da 29 Nuwamba, 2015 Miladiyya.

Ra’ayoyin Da Aka Samu

An fassara rubutacciyar wasiƙar Ayatollah Khamna'i zuwa ga matasan Turai da Arewacin Amurka zuwa harsuna daban‑daban, kuma an wallafa ta a shafukan sada zumunta.

Haka kuma Kamfanin Labarai na Ahlul‑Baiti (ABNA) ya fassara wannan wasiƙa zuwa harsuna kusan hamsin, tare da sanya ta a samun jama'a...

Bayan shekara guda da fitar wasiƙar farko, an kuma buga wani littafi mai suna “Sharhin Wasiƙa”, wanda yake bayani da ƙarin haske game da abin da wasiƙar ta ƙunsa

Maƙaloli Masu Alaƙa

• Wasiƙar Ayatullah Khamene'i zuwa ga Ɗaliban Jami'a Masu Goyan Bayan Palasɗinawa