Daƙiƙa:Sayyid Jawad Husaini Khamna'i

Sayyid Jawad Husaini Khamna'i

Ɗaya daga cikin Mujtahidan Shi'a
Nasaba	Sharifai jikokin Husaini
Tarihin haihuwa	16 Disamba 1895 miladiyya.
Mahaifa	Najaf
Tarihin rasuwa	Asabar, 5 Yuli 1986M shekarar 1986M/27 Shawwal shekarar 1406ƙ
Garin da ya rasu	Mashhad
Mahallin kabari	Haramin Imam Rida (A.S)
Fitattun dangi	Sayyid Ali Husaini Khamna'i (Ɗansa)•Sayyid Mujtaba Khamna'i(Jikansa)•Sayyid Hashim Mirdamad Najaf Abadi(Mahaifin matarsa)•Muhammad Wa'iz Zade Khurasani (Gida ɗaya suka yi aure)
Wurin karatu	Tabriz•Mashhad•Najaf
Izinin Ijtihadi daga	Muhammad Husaini Na'ini•Sayyid Abul Hassan Isfahani•Agha Diya'u Iraƙi
Sauran abubuwa	Koyarwa•limancin masallacin iyalin Siddiƙi na kasuwar Mashhad•Masallacin Juma'a na Goharshad

Sayyid Jawad Husaini Khama'i (16 Disamba 1895M – 5 Yuli 1986M) yana daga cikin malamai da mujtahidan Shi'a, kuma shi ne mahaifin Ayatullahi Khamna'i, Jagora na biyu na Jamhuriyar Musulunci ta Iran.

Ya yi karatu a Tabriz, Mashhad, da Najaf. Bayan ya samu matsayin ijtihadi a Najaf, sai ya ƙaura zuwa Mashhad, inda ya zauna a can har zuwa ƙarshen rayuwarsa.

Haihuwa Da Asali

Sayyid Jawad Khamna'i an haife shi a Najaf, kuma tun yana ƙarami ya zo Tabriz tare da iyalinsa.

Asalinsa yana komawa ga sharifai jikokin Husaini, kuma zuriyarsa ta haɗu da Sulɗan Sayyid Muhammad, wanda ta hanyar tsakani huɗu yake daga cikin ƴaƴan Imam Sajjad (A.S).

Saboda zalunci da tsanantawar da gwamnatin Abbasiyawa ta yi, Sayyid Muhammad ya yi hijira zuwa yankunan tsakiyar Iran kamar Tafrish, Ashtiyan, da Farahan. Mutanen waɗannan yankuna sun tarbe shi da girmamawa, amma daga baya jami'an Abbasiyawa sun kama shi a Tafrish suka shahadantar da shi. Kabarinsa yana garin Miƙan, a Arak.

Sayyid Muhammad, ɗan Sayyid Muhammad Taƙiyyu, ɗan Sayyid Mirza Ali, ɗan Sayyid Mirza Akbar, ɗan Sayyid Fakhrud-din , yana daga cikin zuriyar Sultan Sayyid Muhammad. Ya yi hijira daga Tafrish zuwa Azerbaijan, inda ya zauna a garin Khameneh, wanda yake kusan kilomita 80 arewa maso yammacin Tabriz.

Bayan sa, Sayyid Husain, ɗan Sayyid Muhammad, ya ci gaba da zama a Khamene yana wa'azin tare da shiryar da mutane. Daga baya ya tafi Najaf, inda ya shagaltu da karatu da muhawarar ilimi (darasi da bahasi).

Shi ne kakan Ayatullahi Khamna'i, Jagoran Jamhuriyar Musulunci ta Iran.

Mata Da Ƴaƴa

A kusan shekarunsa na arba'in, matar Sayyid Jawad Khamna'i ta farko, wadda ta haifa masa ƴaƴa mata uku, bayan nan ta rasu.

Bayan rasuwar matar tasa ta farko, ya auri Khadije Mirdamadi, ƴar Ayatullahi Sayyid Hashim Mirdamadi Najaf Abadi.

Daga Khadija Mirdamadi, Ayatullah Sayyid Jawad Khamna'i ya samu ƴaƴa biyar:

• Sayyid Muhammad
• Sayyid Ali
• Badr al‑Sadat
• Sayyid Hadi
• Sayyid Muhammad Hassan

Khadija Mirdamadi ta rasu a ranar 6 Agusta 1989M (15 Mordad 1368 SH) sakamakon bugun zuciya, kuma an binne ta a harabar Haramin Imam Rida (A.S) a Mashhad, a gefen kabarin mijinta.

Karatu

Sayyid Jawad Khamna'i ya yi karatunsa na farko (Matakin sharar fage) a makarantun Tabriz. Daga baya ya zauna a Mashhad na kusan watanni tara, sannan ya koma Tabriz.

Ayatullah Sayyid Abul Ƙasim Khuyi, Ayatullahi Ali Akbar Khuyi, da Ayatullahi Sayyid Jawad Khamna'i a birnin Mashhad a ƙarshen shekarun ashirin na kalandar Hijira shamsi

An ce a wancan lokacin hanyar Tehran–Mashhad ba ta da tsaro. Saboda haka Sayyid Jawad ya tafi Badkube, daga nan ya bi Tekun Caspian zuwa Ishƙe'abad, sannan daga can ya isa Khurasan.

A Mashhad ya ci gaba da karatunsa, sannan a shekarar 1345 hijira ƙamariyya (AH) ya tafi Najaf domin ƙarin karatu.

Malamansa

Sayyid Jawad Khamna'i ya yi karatun fiƙihu da usulul fiƙhi a Mashhad a wajen manyan malamai kamar:

• Agha Husaini Ƙummi
• Mirza Muhammad Agha Zade Khurasani (Kafa'ī)
• Mirza Mahadi Isfahani
• Fadil Khurasani

A fannin falsafa kuma ya yi karatu a wajen:

• Agha Buzurge Hakim Shahidi
• Asadullah Yazdi.

Daga baya a Najaf, ya yi karatu a wajen manyan malamai irin su:

• Muhammad Husain Na'ini
• Sayyid Abul Hassan Isfahani
• Agha Daya'u Iraƙi

Kuma daga gare su ne ya samu izinin ijtihadi.

Zama A Mashhad

Ayatullahi Sayyid Ali Khamna'i tare da mahaifinsa

Bayan ya kammala karatunsa a Najaf kuma ya samu matsayin Ijtihadi, ya koma Iran sannan ya tafi Mashhad. A can ya fara koyarwa, kuma ya zama limamin masallacin Siddiƙi na kasuwar Mashhad (wanda ake kira Masallacin mutanen Azerbaijan).Haka kuma yana daga cikin limaman jam'i na Masallacin Jami'i na Goharshad.

Ya kasance mai matuƙar son karatu da bincike. mhauwarar ilimi da yake yi a kullum da takwarorins, ciki har da Mirza Husain Aba'i, Sayyid Ali Akbar Khuyi (Mahaifin Ayatullah Khuyi), Mirza Habib Maliki da saurans, ta ci gaba na tsawon shekaru masu yawa.

Halayensa Na Ƙashin Kai

Ya kasance mutum mai tsoron Allah, kuma ba ya damuwa da abubuwan duniya, yana rayuwa mai sauƙi da zuhudu. Bayan nasarar juyin juya halin Musulunci a Iran, duk da cewa ƴaƴansa sun kai manyan muƙaman siyasa da gudanarwa, ya ci gaba da rayuwarsa ta sauƙi da zuhudu kamar da.

Saboda kyawawan halaye da kamalolin ɗan Adam da yake da su, mutane suna yarda da shi kuma suna girmama shi sosai.

Rasuwa

Sayyid Jawad Khamna'i ya rasu a ranar 14 Tir 1365 SH, wanda ya yi daidai da 27 Shawwal 1406 AH. 1986M. Ayatullah Abul Hassan Shirazi, limamin Juma'ar Mashhad, ne ya yi masa sallar jana'iza. Daga nan aka binne shi a farrfajiyar da ke bayan kabarin Imam Rida (A.S), a kusa da Darul al‑Faizi.

Imam Khomaini ma ya aike da saƙon ta'aziyya ga Ayatullahi Khamna'i kan rasuwar mahaifinsa. A cikin saƙon, ya bayyana Ayatullahi Sayyid Jawad Khamna'i a matsayin malami mai tsoron Allah kuma mai sadaukarwa.

Ƙaddamar Da Littafin "Zindagi Injast"

A daidai lokacin Ranar Alƙalami (Ruze Ƙalam), a cikin wani biki na musamman, an ƙaddamar da littafin "Zindagi Injast" (Rayuwa Tana Nan) wanda Mahadi Ƙazli ya rubuta.

Littafin yana magana ne game da rayuwar Ayatullah Sayyid Jawad Khamna'i. An gudanar da wannan bikin ƙaddamarwar a Masallacin Juma'a na Tabriz.